Qarabağ münaqişəsi vətəndaş cəmiyyətinin nümayəndələri ilə müzakirə edilib

ABŞ-ın dövlət katibinin Avropa və Avrasiya məsələləri üzrə müavininin köməkçisi Tina Kaydanov cümə günü Bakıda Ermənistan-Azərbaycan münaqişəsini Azərbaycanın vətəndaş cəmiyyətinin nümayəndələri ilə müzakirə edib. “Bu, Kaydanovun Azərbaycana ilk səfəridir və səfər daha çox tanışlıq xarakteri daşıyır. Onu bütün bu məsələlərlə bağlı vətəndaş fikri maraqlandırıb”, – Trend News-a Helsinski Vətəndaş Assambelyasının həmsədri Arzu Abdullayeva bildirib.

Azərbaycan QHT-lərinin nümayəndələri Kaydanovun nəzərinə vətəndaş cəmiyyətinin Dağlıq Qarabağ münaqişəsinin tez bir zamanda həllinə maraqlı olduğunu çatdırıblar. “Bu, hakimiyyət və vətəndaş cəmiyyəti arasında tək ümumi fikirdir”, – Abdullayeva bildirib. “Ona bildirildi ki, Azərbaycanda heç kəs Dağlıq Qarabağın itirilməsi ilə razılaşmayacaq, belə ki, bu bizim torpağımızdır”, – o əlavə edib.

Kaydanovun ikigünlük səfəri çərçivəsində Xarici İşlər Nazirliyində, Azərbaycanın Maliyyə Nazirliyində görüşlərin keçirilməsi planlaşdırılır. Eyni zamanda, Prezident İlham Əliyev ilə də görüşün keçirilməsi nəzərdə tutulur, Trend News-a ABŞ-ın Bakıdakı səfirliyindən bildirilib. Kaydanov ABŞ-ın dövlət katibi müavininin köməkçisi vəzifəsinə bu ilin aprel ayında Meytu Brayzanı əvəz edərək keçib.

İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik 7 rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk Qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.

Ünvan: M.Mirqasımov 4/41 Bakı AZ 1007, Azərbaycan

Tel/Fax : (+994 12) 441 09 24

Qaynar xətt”-lər: 408-30-17/27

Pulsuz: (088) 408-30-17/27

E-mail: [email protected]

1905.az STUDIO