Ermənistanın Azərbaycanın işğal olunan ərazilərində yerləşən Xocalı hava limanının mülki uçuşları təmin etmək məqsədilə istismar edilməsi niyyəti beynəlxalq hüquqa ziddir. Bu barədə Trend-ə cümə günü Azərbaycan Mülki Aviasiya Administrasiyasından məlumat verilib.
“Bizim mu məsələdə mövqeyimiz dəyişməz olaraq qalır – Ermənistan tərəfinin addımları yanlışdır və beynəlxalq normalara uyğun deyil”- administrasiyadan bildiriblər.
Bir müddət əvvəl Ermənistan KİV-in ölkənin Mülki Aviasiya Baş İdarəsinin rəhbəri Artyom Movsisyana istinadən verdiyi məlumata görə, Ermənistan Mülki Aviasiyası Baş İdarəsi Azərbaycanın işğal edilmiş ərazilərinə mülki təyyarələrinin uçuşuna icazə verəcək. Trend-in məlumatına görə, Movsisyan konkret tarix barəsində məlumat verməkdən imtina edib. Onun sözlərinə görə, uçuşları Ermənistanın 19 yerli təyyarəsi həyata keçirəcək. Uçuş müddəti 45-50 dəqiqə təşkil edəcək.