Azərbaycan və Ermənistan parlamentlərinin deputatları Dağlıq Qqarabağ münaqişəsinin həlli yollarını müzakirə edəcəklər. “Moskvada keçiriləcək görüşdə Dağlıq Qarabağ münaqişəsinin nizamlanmasının sürətləndirilməsi, məcburi köçkünlərin yurd-yuvalarına qayıtması, iki icmanın nümayəndələrinin birgə yaşayışı məsələləri müzakirə olunacaq”, – çərşənbə axşamı Trend News-a Milli Məclisin İnsan haqları komitəsinin sədri Rəbiyyət Aslanova deyib. Aslanova deyib ki, görüş Azərbaycanın Rusiyadakı səfiri Polad Bülbüloğlunun təşəbbüsü ilə keçiriləcək.

İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.

Azərbaycan və Ermənistan deputatlarının görüşü oktyabrın 22-də keçiriləcək.