Azərbaycan Ombudsmanı QHT-lər haqqında qanunun müzakirəsinin dayandırılması ilə bağlı Milli Məclisə müraciət edib

Azərbaycan Respublikasının İnsan Hüquqları üzrə Müvəkkili Elmira Süleymanova Avropa İttifaqının Şərqi Avropa və Mərkəzi Asiya üzrə İşçi Qrupunun (COEST) nümayəndələrini qəbul edib. Ombudsman Aparatının mətbuat xidmətindən APA-ya verilən məlumata görə, görüş tanışlıq məqsədi daşıyıb. E. Süleymanova Azərbaycan Ombudsçam təsisatı barədə qonaqlara məlumat verib.

Müvəkkil Ombudsman təsisatının BMT-nin İnsan Hüquqları üzrə Ali Komissarlığı nəzdində MİHT Beynəlxalq Əlaqələndirmə Komitəsi (BƏK) tərəfindən Avropanın 11 nüfuzlu ombudsman institutu sırasında “A statusu” ilə akkreditasiya olunduğunu, bu statusun təsisata BMT-nin Saziş qurumlarına, eləcə də İHŞ-ya hökumət tərəfindən təqdim olunan hesabatların hazırlanması işində iştirak etmək, alternativ hesabatlar hazırlamaq səlahiyyətləri verdiyini qeyd edib.

E. Süleymanova Azərbaycanda media nümayəndələrinin, o cümlədən məhkum jurnalistlərin hüquqlarının təmin olunması vəziyyəti barədə qonaqların sualını cavablandırıb. Məhkum jurnalistlərin əfv olunması ilə bağlı Ombudsmanın əfv komissiyasına müraciət etdiyi, həmin müraciətlər nəzərə alınaraq bir neçə jurnalistin əfv edildiyi bildirilib. Müvəkkil qonaqların ölkə parlamentində müzakirəyə çıxarılan “Qeyri-hökumət təşkilatları (ictimai birliklər və fondlar) haqqında” Azərbaycan Respublikasının Qanununa dəyişikliklərlə bağlı suallarını da cavablandırıb.

Ombudsman adı çəkilən qanuna nəzərdə tutulmuş dəyişikliklərlə əlaqədar yaranmış problemin həllində kömək göstərilməsi ilə bağlı QHT-lər, o cümlədən Milli QHT Forumu üzvləri tərəfindən ona müraciət olunduğunu qeyd edib.

Bildirilib ki, Azərbaycanın ratifikasiya etdiyi Vətəndaş və Siyasi Hüquqlar haqqında Beynəlxalq Pakta, İnsan Hüquq və Əsas Azadlıqların Müdafiəsi haqqında Avropa Konvensiyasına əsasən üzərinə götürdüyü öhdəlikləri, eyni zamanda dövlətimizin vətəndaş cəmiyyətinin inkişafı istiqamətində həyata keçirdiyi davamlı siyasəti nəzərə alaraq, müvəkkil QHT-lərin fəaliyyətini məhdudlaşdıracaq həmin qanun layihəsinin müzakirəsinin dayandırılması və ya payız sessiyasına qədər təxirə salınması ilə bağlı Milli Məclisə müraciət edib.

Qeyd edək ki, Avropa İttifaqının Şərqi Avropa və Mərkəzi Asiya üzrə İşçi Qrupu (COEST) Avropa Birliyinə üzv ölkələrin qurum yanında Daimi Nümayəndəliklərinin diplomatlarından ibarət olan bir təsisatdır. Qrup heyətinin tərkibinə Çexiya, Almaniya, Fransa, Böyük Britaniya, İtaliya, İsveç, Finlandiya, İrlandiya, Rumıniya, Belçika, Danimarka, Slovakiya, Litva, Estoniya və digər ölkələrin nümayəndələri daxildir.

Ünvan: M.Mirqasımov 4/41 Bakı AZ 1007, Azərbaycan

Tel/Fax : (+994 12) 441 09 24

Qaynar xətt”-lər: 408-30-17/27

Pulsuz: (088) 408-30-17/27

E-mail: [email protected]

1905.az STUDIO