Mayın əvvəlində Tbilisidə Azərbaycan, Türkiyə və Gürcüstan prezidentləri İlham Əliyev, Abdullah Gül və Georgi Marqvelaşvilinin iştirakı ilə görüş keçiriləcək. Trend-in məlumatına görə, bu barədə çərşənbə axşamı Gürcüstan XİN rəhbərinin birinci müavini David Zalkaniani bəyan edib.

Onun sözlərinə görə, sammitdə Gürcüstan ali hakimiyyəti təmsil olunacaq və onun çərçivəsində prezidentlərlə, baş nazirlərlə və icra hakimiyyəti nümayəndələri ilə görüşlər keçiriləcək:

“Sammit çərçivəsində təbii ki, bu ölkələr arasında əməkdaşlıq məsələləri müzakirə olunacaq. Hər iki ölkə bizim üçün vacibdir. Bizdə maraqlı enerji və infrastruktur layihələr var və həmin mövzular görüşdə əsas mövzulardan biri olacaq”.

Görüş üçtərəfli formatda keçiriləcək. Bu formatda artıq XİN rəhbərlərinin iki görüşü və üç ölkənin liderlərinin bir görüşü keçirilib.