Serbiya Prezidenti Tomislav Nikoliçin Azərbaycana rəsmi səfəri çərçivəsində onun xanımı Dragitsa Nikoliç fevralın 8-də Müasir İncəsənət Muzeyində olub.
Burada qonağa məlumat verilib ki, muzey Azərbaycanın birinci xanımı, Heydər Əliyev Fondunun prezidenti Mehriban Əliyevanın təşəbbüsü ilə yaradılıb.
Bildirilib ki, buradakı ekspozisiyanın əsasını XX əsrin ikinci yarısından bu günədək Azərbaycanın ən yaxşı avanqard rəsm və heykəltəraşlıq əsərləri təşkil edir. Muzeydə Azərbaycanın adlı-sanlı və gənc, əsasən avanqard üslubda işləyən rəssam və heykəltəraşlarının 1000-dək işi toplanıb.
Qonaq Azərbaycanın xalq rəssamları Səttar Bəhlulzadə, Böyükağa Mirzəzadə, Elmira Şahtaxtinskaya, Tahir Salahov, Ömər Eldarov, Nadir Əbdürrəhmanov və digər tanınmış fırça ustası və heykəltəraşların əsərləri ilə tanış olub.